KHUAFO
Khuafo Khua cu AD 1727 ah rak tlakmi khua a si. Hniarlawn khuami unau rual Mualcin, Tlanglian, Khualchawn, Famcun hna nih khuatlak ding in an i timhtuah hnu ah Ramthlo in Cenhrang, Halkha khuathar in Thlaceu, Tiphul in Cinzah, Hnialum, Runkhar, Conhlun, zaathang, Thlohthang, Hngiarthul, Mangpachung, Thihlum hna nih an rak tlakmi a si. Inn tlawmte lawngvan si ral vengtu tiin Mangkheng khuami Hlawnceu chung Tial Khup cu khuabawi ah an rak zonh i Tial Khup nihcun a umpi hna. Kum zeizawzat an um hnu ah Khuali ral a rak hrat caah Thlanrawn khuami Hlawnceu Calngau chung Lian Kung cu khuabawi kan țuanpiak an ti i Lian Kung nihcun khuachiah rawlret zong a rak ei. Lian Kung cu mirum milian a hung si i sia zong tampi a rak ngei. Nihin tiang in a siakawm nih ai hngal kho rih. Khuami nih amah upatnak ah lung a san pe 9, a vang pe 5, achahpe 3 an rak phun I a tutuang hin a um ko rih I Calngau lung tiah auh thai a si.
Khuafo timi min cu an khua pawngkap i a ummi tlangbo chuankhan in an rak i sakmi a si. “Fo” timi cu a fong asiloah a cuang tinak a si. Khuafo khua cu a țhangcho ngaingai i inn 300 tluk tiang an rak si. Hlan lio cu khualhat le khuakhat i tuk lebi doh a rak si caah Khuafo khua zong cu Chuncung le Sopum le Thantlang khua hna hi an ral ngan ngaingai an si caah, kum 98 hrawng an um hnu AD 1824 hrawng ah an rak țio i a cheu cu an rakratnak khua ah a kirmi an um i Cinzah phun le Cenhrang phun hi Lungzarh khua ah an rak kal ve. Cu bantukin cun a cheu cu mizoram cerhlun le hngarchip khua hna ah an rak um. A cheu cu Bawm ram ah an lan i a cheu cu Thantlang bawi Za Huat nawl peknak in Dawn Khua khi an rak tlak.
Khuafo khua cu an țio hnu ahcun khua țhing ah a cang. Kum 63 hrawng a rauh hnu AD 1887 ah Lungzarh i a rak zammi Cinzah in Lian Cem le Cenhrang in Hrang Chum nih Halkha Zathang Darkhuah chung Ni Kual cu khua țhing hlam yțhan ding in an va sawm i khua cu an rak tlak țhan. Ramthlo, Hnuarlawn, Thlanrawn le Hakha i a rak kalmi Khuafo midang hna nihcun an van fuk țhan hna i cuticun khuafo cu nihin nitiang hin a hung hmun lan.
Kum 1972 ah atu khuafo khua ahkhin țhial hram an rak i thok i 1975 ah an khuapi in an rak i țhial dih. An rak i țhial ka ahhin inn 26 an rak si. Kum 2000 hrawng tiang ahhin inn 63 hrawng tiang an rak karh i minung in 347 an rak um. Pu Phun Kian khuabawi a țuan lio 1950 kum ah Mission sianginn an rak hnu i Pu Ral Hmung Lai vuanci a țuan chung ah Cozah sianginn Tangli tiang an rak hmu. Pu Za Hre Lian Lai vuanci a țuan tikah Pu Ral Hmung nih a rak pekmi hna cozah sianginn cu a chuh țhan hna i an fale cu Lungzarh ah an rak chiah hna. Private sianginn an tuah i kum zeimawzat a rauh hnu kum 1978 ah cozah sianginn midle School an hmuh țhan.
Pu Ming Hnin(tleicia) UNDP a țuan lio ah a mah bawmhnak in kum 1997 may thla ah khua chung ah Ti kan hmu i August thla ah Mei(electric) kan hmu. Japan ral țih in Halkha khua in 1938 kum ah a rak zammi Saya Phir Thang te chung nih Khuafo khua cu Thawngțha tlaici an rak tuhnak thawng in Khrihfa ah an cang. Atu ahcun Khrihfabu pathim a um i Baptist, Believer le BMC hna an si. Ramleng kal a lar hnu in inn siseh, minung siseh an zor deuh chin lengmang i kum 2022 tiang ahhin inn 55, minung in 230 hrawng an um. Kawl Ralhrang nih rampi uknakban lak hnu kum 2023 March 30 ah khuafo khua cu vanlawng in an kah i minung pa 9 nunnak a rak liam i hliam hma a pumi tampi an rak um. Inn le biakinn tampi an rawk. Cuni thok cun khuafo ah an um ngam ti lo caah khua kip le hmun kip ah an i țhek i an zam cio. Khua an ngaih caan le an lungfah an celh lo caan poh ah a cikpak tete in khua cu an rak veh tawn.
